काठमाडौँ, पुस १७
नेपाल सरकारले कतार राज्य सरकारले प्रदान गरेको आमिरी आममाफी प्रति हार्दिक आभार व्यक्त गरेको छ । कतारको राष्ट्रिय दिवस तथा अन्तर्राष्ट्रिय मानव अधिकार दिवसको अवसरमा कतार सरकारले १३ जना नेपाली कैदीलाई आममाफी प्रदान गरेको हो ।
परराष्ट्र मन्त्रालयले बिहीबार जारी गरेको प्रेस विज्ञप्तिमा मानवीय आधारमा गरिएको उक्त क्षमादानलाई नेपाल–कतारबीचको मैत्रीपूर्ण तथा सौहार्दपूर्ण द्विपक्षीय सम्बन्धको गहिरो उदाहरणका रूपमा उल्लेख गरिएको छ ।
विज्ञप्तिमा भनिएको छ, “कतार सरकारको यस प्रकारको मानवीय कदमले दुई देशबीचको मित्रता, आपसी समझदारी र सहकार्यलाई थप मजबुत बनाउने विश्वास नेपाल सरकारले लिएको छ।”
परराष्ट्र मन्त्रालयले आममाफी प्रदान गर्ने कतार सरकारको निर्णयलाई उच्च मूल्यांकन गर्दै भविष्यमा पनि यस्ता सहयोग र सद्भाव कायम रहने अपेक्षा व्यक्त गरेको छ ।
कतारको राष्ट्रिय दिवस तथा अन्तर्राष्ट्रिय मानव अधिकार दिवसको अवसरमा कतारको जेलमा रहेका तेह्र (१३) जना नेपाली नागरिकलाई आममाफी प्रदान गरिएको सन्दर्भमा नेपाल सरकारले कतार सरकारप्रति आभार व्यक्त गरेको छ । यस सम्बन्धमा श्री परराष्ट्र मन्त्रालयले प्रेस विज्ञप्ति जारी गरेको हो ।
